Ligjvënësi demokrat Bennie Thompson, kryetar i Komisionit të Kongresit që po heton sulmin e 6 janarit 2021 në Kapitol, tha të martën se ishte infektuar me COVID-19, por se seanca dëgjimore e Komisionit e planifikuar për të enjten do të vazhdojë.
Ligjvënësi Thompson tha në Twitter se ai rezultoi pozitiv të hënën dhe po përjetonte simptoma të lehta. Ai tha se ishte plotësisht i vaksinuar dhe kishte marrë edhe dozat përforcuese të vaksinës kundër COVID-19.
Komisioni i përzgjedhur i Dhomës së Përfaqësuesve ka mbajtur një numër seancash mbi sulmin ndaj Kapitolit nga mbështetësit e presidentit të atëhershëm republikan Donald Trump në një përpjekje të dështuar për të ndërprerë seancën e Kongresit për çertifikimin e fitores në zgjedhjet e vitit 2020 të demokratit Joe Biden.
“Ndërsa kryetari Thompson është prekur nga COVID-i, ai ka udhëzuar komisionin e përzgjedhur që të vazhdojë seancën dëgjimore të së enjtes në mbrëmje”, thuhet në një deklaratë të lëshuar nga komisioni i 6 janarit.
Seanca dëgjimore, e cila synon të tërheqë një audiencë të gjerë televizive në Shtetet e Bashkuara gjatë orëve kryesore të shikueshmërisë, do të jetë seanca e tetë publike e komisionit në gjashtë javët e fundit.
Sipas mediave amerikane, dy zyrtarë të Shtëpisë së Bardhë në administratën e zotit Trump, ish-zyrtari i Këshillit të Sigurisë Kombëtare Matthew Pottinger dhe ish-zëvendës Sekretarja e Shtypit Sarah Matthews, pritet të dëshmojnë të enjten. Komisioni nuk ka konfirmuar se ata do të dëshmojnë dhe nuk ka publikuar një listë dëshmitarësh./VOA
