Vendimi për mbajtjen e konferencave të para ndërqeveritare dhe fillimi i negociatave me Maqedoninë e Veriut dhe Shqipërinë, gjatë presidencës franceze me BE-në do të ishte punë e drejtë dhe e duhur me të gjitha efektet pozitive për të gjithë rajonin.
Ky është mendimi që mbizotëroi në diskutimin e mëngjesit të sotëm të punës së ministrit të Jashtëm, Bujar Osmani, me ministrat e jashtëm të vendeve anëtare të Bashkimit Evropian, organizuar nën ombrellën e ministrit të Punëve të Jashtme të Greqisë, Nikos Dendias.
Sipas MPJ-së, takimi i është kushtuar dosjes evropiane të Maqedonisë së Veriut dhe është mbajtur në margjinat e Këshillit për Punë të Jashtme të BE-së. Në takim morën pjesë edhe Përfaqësuesi i Lartë i BE-së për Punë të Jashtme dhe Sigurisë dhe njëherit Zëvendës/president i KE-së Josep Borrell dhe komisioneri i BE-së për Zgjerimin Oliver Varhei.
