Një numër i madh kolonësh izraelitë kanë hyrë me forcë në kompleksin e Xhamisë Al-Aksa në Kudsin Lindor të pushtuar me rastin e festës hebraike Hanukkah, transmeton Anadolu Agency (AA).
Departamenti i Vakëfit Islam të Kudsit, i drejtuar nga Jordania, tha se 159 kolonë hynë në pikën e nxehtë në grupe përmes portës Al-Mugharbah të Xhamisë Al-Aksa nën mbrojtjen e policisë.
Sipas njoftimit, në mesin e tyre ishte edhe deputeti i ekstremit të djathtë, Zkiva Forget.
Grupet hebraike u kanë bërë thirrje mbështetësve që të mblidhen në kompleksin Al-Aksa për të shënuar festën tetë-ditore Hanukka, e cila filloi më 18 dhjetor.
Për muslimanët, Al-Aksa përfaqëson vendin e tretë më të shenjtë në botë. Hebrenjtë, nga ana e tyre, këtë zonë e quajnë Mali i Tempullit, duke pretenduar se aty në kohërat e lashta ndodheshin dy tempuj hebrenj.
Izraeli pushtoi Kudsin Lindor, ku ndodhet Al-Aksa, gjatë Luftës Arabo-Izraelite të vitit 1967. Ajo aneksoi të gjithë qytetin në vitin 1980, në një lëvizje që nuk u njoh kurrë nga komuniteti ndërkombëtar.
