Një përleshje fizike ka ndodhur në darkën e fundvitit të ndërmarrjes publike “Prishtina Parking” të martën në mbrëmje, ka konfirmuar drejtori i kësaj ndërmarrjeje, Sokol Havolli.
Havolli ka thënë se nuk i di arsyet e zënkës, por se vetë e ka thirrur Policinë “kur ka kuptuar se dy punonjës të ndërmarrjes kanë pasur incident”.
Policia ka konfirmuar rastin duke thënë se një person është arrestuar, ndërsa një person tjetër i është nënshtruar intervenimit kirurgjik për shkak të lëndimit dhe po trajtohet në QKUK.
Me vendim të prokurorit, i dyshuari është dërguar në mbajtje, ka bërë të ditur Policia në raportin 24-orësh të mërkurën.
