Mbrojtësi i djathtë, Alvaro Odriozola do të rikthehet te Real Madridi.
Në gusht të vitit 2021, Odriozola kaloi te Fiorentina nga ‘Mbretërit’ në formë huazimi.
Marrëveshja e tij me ekipin italian përfundon në qershor të këtij viti, andaj spanjolli do të rikthehet në ‘Santiago Bernabeu’.
Këtë e ka konfirmuar vetë lojtari, duke thënë se ka kaluar një kohë të mirë në Seria A, por është i gatshëm të luajë për Realin.
“Unë nuk do të qëndroj në Fiorentina. Koha ime atje ishte e mrekullueshme, por tani jam gati për Real Madridin.
Ky është qëllimi im: të jem pjesë e ekipit të Real Madrid sezonin e ardhshëm”, shtoi ai për ‘Onda Cero’.
Odriozola ka 27 paraqitje me ekipin italian ku ka shënuar një gol dhe dhuruar një asistim.
