Këshilli Programor i RTM-së anulon konkursin për zgjedhjen e zëvendësdrejtorit

Nga Këshilli Programor njoftojnë se procedura e përzgjedhjes u zhvillua në përputhje të plotë me Ligjin për Shërbime Mediatike Audio dhe Audiovizuale dhe Statutin e RTM-së, duke siguruar kushte për transparencë, trajtim të barabartë të të gjithë kandidatëve dhe vlerësim objektiv të programeve të tyre.

Në kuadër të procedurës u shqyrtuan aplikimet e gjithsej 11 kandidatëve. Pas votimit, asnjë nga programet nuk mori shumicën e votave nga numri i përgjithshëm i anëtarëve të Këshillit Programor, që është kusht për zgjedhje.

Në përputhje me statutin, u zhvillua një votim i përsëritur për dy programet me numrin më të madh të votave, por as në këtë fazë nuk u sigurua shumica e kërkuar. Konkurs i ri për zgjedhjen e një zëvendësdrejtori të RTM-së do të shpallet brenda 30 ditëve, njoftojnë nga Këshilli Programor i Radiotelevizionit të Maqedonisë.