Bashkimi Evropian do të akordojë 100 milionë euro mbështetje financiare shtesë për Forcat e Armatosura të Libanit, në një kohë kur vendi po përpiqet të ruajë armëpushimin e brishtë me Izraelin.

Shefja e politikës së jashtme të BE-së, Kaja Kallas, e konfirmoi vendimin duke theksuar rëndësinë e forcimit të institucioneve shtetërore libaneze.

“Armëpushimi i ri midis Izraelit dhe Libanit ofron një shans për të ndaluar luftimet ushtarake në shkallë të plotë, por zjarri i vazhdueshëm tregon se ai është ende i dobët”, tha Kallas.

Ajo shtoi se mënyra më efektive për të ulur kërcënimin që vjen nga Hezbollahu është “forcimi i shtetit libanez, fuqizimi i institucioneve të tij dhe rivendosja e monopolit të tij mbi përdorimin e forcës”. Deklarata u bë publikisht në platformën X.

Ushtria libaneze konsiderohet një aktor i veçantë nga Hezbollahu – grupi militant shiit i mbështetur nga Irani që vepron brenda Libanit. Ndryshe nga Hezbollahu, ushtria libaneze nuk ka nisur operacione ofensive kundër Izraelit, por luajt rol mbikëqyrës dhe stabilizues gjatë periudhave të tensionuara.

Ndihma financiare e re e Bashkimit Evropian synon të rrisë kapacitetet e ushtrisë libaneze për të ruajtur rendin, për të zbatuar armëpushimin dhe për të forcuar kontrollin e shtetit mbi të gjithë territorin libanez, duke përfshirë zonat ku Hezbollahu ka ndikim të fortë.

Burimi: botasot.info