Reperja e njohur Tayna ka shënuar një moment të rëndësishëm në karrierën e saj, duke festuar 8-vjetorin e saj artistik me një event të veçantë në Prizren, qytetin e saj të lindjes.
Gjatë kësaj mbrëmjeje festive, ajo mblodhi miq, familjarë dhe figura të njohura të skenës muzikore, për të ndarë jo vetëm suksesin e rrugëtimit të saj artistik, por edhe projektin më të ri muzikor.
Eventi shënoi edhe promovimin e albumit të saj të fundit, “Genesis”, i cili ka tërhequr vëmendje të madhe nga publiku dhe rrjetet sociale.
Një nga momentet kryesore të mbrëmjes ishte shfaqja e dokumentarit të realizuar nga vetë Tayna, ku ajo tregon prapaskenat e punës, procesin krijues dhe udhëtimin drejt realizimit të albumit. Në dokumentar përfshihen edhe xhirime nga qytete të ndryshme evropiane, si Berlini dhe Barcelona, duke zbuluar nga afër përkushtimin dhe punën intensive pas këtij projekti muzikor.
Dokumentari tashmë është publikuar në platformën YouTube, ku fansat mund ta ndjekin të plotë dhe të zbulojnë më shumë rreth sfidave dhe punës së madhe që qëndron pas realizimit të albumit.
Në fund, Tayna falënderoi publikun për mbështetjen e vazhdueshme, duke theksuar se ky 8-vjetor shënon vetëm një etapë të re drejt projekteve edhe më të mëdha në të ardhmen.
Burimi: botasot.info
