Në Komunën e Pejës sot është hapur qendra më e re e institucionit arsimor “Bonevet”. E njëjta u konsiderua e rëndësishme për të rinjtë e kësaj komune për arsimim në fushën e artit dhe matematikës.
Hapja e këtij institucioni arsimor u bë me përkrahjen e Shteteve të Bashkuara të Amerikës. Me këtë rast, ambasadori Jeffrey Hovenier, tha se ShBA-ja është e përkushtuar për ta ndihmuar Kosovën
Hovenier: Jemi të përkushtuar për ta ndihmuar Kosovën
“Ne jemi vërtet të lumtur që kemi mundësinë të mbështesim Bonevet në hapjen e kësaj qendre në Pejë, meqenëse Bonevet i ofron të rinjve mundësi arsimi në fusha të ndryshme si inxhinieri, art dhe matematikë. Vet drejtpërdrejt e kam pa ndikimin e madh që ‘Bonevet’ ka pasur në jetën e shumë të rinjve. Shtetet e Bashkuara të Amerikës janë të përkushtuara për të mbështetur Kosovën që të marrë vendin e saj të duhur në strukturat evropiane dhe euro-atlantike. Kjo përfshinë edhe mbështetjen për një ekonomi të begatshme, ku i mundëson të rinjve të gjejnë punë në Kosovë”, tha ai.
Kryetari i Komunës së Pejës, Gazmend Muhaxheri, tha se hapja e kësaj qendre arsimore do t’i ndihmojë shumë të rinjve pejanë.
Muhaxheri: Për “Bonevet Peja” na janë dashur katër vjet e gjysmë
“Një shoqëri që planifikon të ardhmen e vet është e sigurt se do të ecë përpara. Neve na është dashur katër vjet e gjysmë për me mundur me fut në planin zhvillimor komunal ndërtimin e qendrës ‘Bonevet Peja’, pasi ka procedura të mëdha burokratike që na kanë pru këtu”, shtoi Muhaxheri.
Në anën tjetër, drejtori menaxhues i fondacionit “Bonevet Peja”, Genc Pilingjurka, tregoi në detaje se në çfarë fushash arsimore do të përfitojnë të rinjt në këtë qytet.
Pilingjurka: Fondacioni ‘Bonevet Peja’ do të jetë shtëpi për të gjitëh të rinjtë e Pejës
“Fondacioni ‘Bonevet Peja’ do të jetë shtëpia inovative dhe kreative për të gjithë të rinjt e Komunës së Pejës. Këtu do të implementohen shumë projekte që kanë për qëllim ngritjen e kapaciteteve të rinjve të të gjitha komuniteteve në fushën e artit, shkencës dhe teknologjisë”, tha ai.
Fondacioni “Bonevet” është i pranishëm edhe me gjashtë qytete të tjera në Kosovë.
