Ura e fshatit Metoq në Sarandë u shemb dy ditë më parë duke izoluar dhjetëra banorë, të cilët e kanë të lidhur jetesën me tokat dhe fshatrat përtej urës. Shkak i dëmtimit sipas banorëve është erozioni dhe kalimi i automjeteve me tonazh të rëndë.
Ura e fshatit Metoq në Sarandë u shemb dy ditë më parë, si pasojë e erozionit.
Dhjetëra banorë dhe fermerë kanë mbetur të izoluar.
Kjo urë lidh fshatin e Metoqit me tokat buqësore, magazinat e misrit dhe bashkitë e Finiqit dhe Konispolit.
“Është shkëputur këmba e urës nga lumi dhe nuk ka ardhur njeri ta shikojë, të marrë masat.”
“Po su bë ura më mirë ikim.”
“Na ka paralizuar komplet.”
Prurjet e lumit në këtë zonë janë të mëdha, aq sa tokat përreth përmbyten çdo vit. Por sipas banorëve masa për rehabilitimin e shtratit të lumit nuk ka pasur kurrë.
“Kjo urë nuk mban më shumë se 20 ton, këta kanë futur 50, 100 ton.”
Banorët e lagjes kanë frikë të dërgojnë fëmijët në shkollë, apo të mbushin uji të pijshëm. Rrëzimi i dy këmbëve të urës nuk e bën më të sigurt as për këmbësorët.
Nga ana tjetër kostoja më e madhe duket se u faturohet fermerëve.
Disa kanë vështirësi për të shkuar natën në stallat e lopëve, dhe disa të tjerë do të paguajnë dyfish për kamionët, që do të vijnë në magazinat e tyre.
“Të kalosh në këmbë dhe është me frikë.”
Banorët janë të shqetësuar për kohën e pacaktuar që do të marrë rikonstruksioni i urës. Deri atëherë ata duhet të kalojnë përmes fshatit Çukë për të shkuar në Sarandë dhe anasjelltas.
