Që një vit më parë, përballë formave të hapura të pasurimit të klanit Trump përmes kriptomonedhave, dhuratës së një avioni 200 milionë dollarësh dhe marrëveshjeve miliardëshe me vendet e Gjirit që kërkonin akses të privilegjuar në Shtëpinë e Bardhë, gazetat amerikane, ato që presidenti i quan “armiq të popullit”, denonconin forma të papranueshme korrupsioni në rritje.
Por Trump nuk u ndal. Jo vetëm kaq, përveçse vazhdoi në të njëjtin drejtim pa fshehur asgjë, jo për transparencë, por për të treguar se askush nuk mund t’i vendosë kufij, ai investoi në kompani, nga Nvidia te Oracle dhe Dell, vlera e aksioneve të të cilave më pas u rrit pas vendimeve të presidentit ose edhe pas lavdërimeve publike dhe thirrjeve të tij për të blerë aksionet e këtyre kompanive.
Pastaj është kapitulli i tregjeve parashikuese si Polymarket, ku vihen baste mbi ngjarje të ardhshme. Po hetohen shumë persona që kanë fituar shuma të mëdha duke vendosur baste për arrestimin e Maduro-s apo sulmin ndaj Iranit vetëm pak orë para kapjes së diktatorit venezuelian dhe nisjes së bombarduesve amerikanë dhe izraelitë. Trump thotë se kjo gjë nuk i pëlqen, por djemtë e tij janë pjesë e biznesit. Djali i madh, Donald Jr., është investitor dhe këshilltar i Polymarket.
Por ajo që ndodhi ditët e fundit me krijimin e një fondi prej afro 1.8 miliardë dollarësh, me të cilin Trump do të mund të kompensojë persona që ai i konsideron viktima të diskriminimit anti-Trump, për shembull pjesëmarrësit në sulmin ndaj Kongresit më 6 janar 2021, dhe me dhënien e imunitetit të përhershëm fiskal dhe civil për të, familjarët dhe bashkëpunëtorët e tij, shkon përtej çdo imagjinate. Dhe e çon në një nivel edhe më të lartë tolerancën ndaj korrupsionit me të cilën Amerika po detyrohet të mësohet.
Sigurisht, Gjykata Supreme, e përbërë në një pjesë të madhe nga gjyqtarë të emëruar prej tij, i kishte garantuar presidentit imunitet total për të gjitha aktet “zyrtare”. Një imunitet personal për vepra penale, me kufij shumë të paqartë.
Beteja
Tani Departamenti i Drejtësisë ka bërë shumë më tepër. Me një akt që nuk kalon në Kongres dhe që është i vështirë të kundërshtohet, i garanton Trumpit imunitet të plotë dhe të përhershëm edhe për shkeljet civile. IRS-i, administrata tatimore amerikane që prej vitesh hetonte të ardhurat e tij nga biznesi i pasurive të paluajtshme dhe televizioni, me dyshime për parregullsi fiskale që arrijnë në 100 milionë dollarë, do të detyrohet të mbyllë gjithçka.
Dhe askush nuk do të mund të hetojë më për krime të mundshme fiskale të familjarëve të tij, apo të “trust-eve, kompanive dhe filialeve apo shoqërive të lidhura me të”.
Rasti, që deri tani ka marrë pak vëmendje për shkak të kompleksitetit, i vështirë për t’u përmbledhur në një titull, meriton të tregohet, sidomos për aspektet groteske. Vite më parë, një punonjës i Booz Allen, që për një periudhë kishte punuar si kontraktor për IRS-in, u dërgoi mediave deklaratat fiskale të disa personave, mes tyre edhe të Trumpit.
Presidenti, duke pretenduar se ishte dëmtuar, kërkoi nga vetë IRS-i, pra një degë e administratës së tij, një dëmshpërblim prej 10 miliardë dollarësh. Shifër absurde dhe, mbi të gjitha, kërkesë pa bazë ligjore, siç shkruhej në një raport prej 25 faqesh të avokatëve të IRS-it.
Gjykatësi dukej skeptik dhe i prirur ta pushonte çështjen, por ai opinion ligjor nuk mbërriti kurrë në gjykatë. U “varros” në një sirtar të Departamentit të Thesarit.
Marrëveshja
Ndërkohë, në Departamentin e Drejtësisë, ku Trump kishte vendosur “me kujdes” dy besnikë të tij, zëvendësministrin Todd Blanche, sot ministër në detyrë në pritje të emërimit zyrtar, dhe Pam Bondi, ish-drejtuese e departamentit e larguar sepse nuk ishte mjaftueshëm e ashpër ndaj armiqve të tij, vetë Blanche përgatiti një “paketë dhuratë” të paraqitur si marrëveshje.
Në këmbim të tërheqjes së padisë, Trump siguroi imunitetin e përhershëm dhe krijimin e një fondi prej 1 miliardë e 776 milionë dollarësh, para të marra nga Thesari pa kaluar në Kongres, i administruar nga pesë persona të emëruar nga ministri dhe që mund të shkarkohen në çdo moment nga presidenti pa dhënë shpjegime.
Republikanët heshtin dhe janë nën shantazh
Përdorimi i këtyre shumave marramendëse do të mbetet sekret. Republikanët, që vite më parë sulmonin Bill dhe Hillary Clinton sepse fondacioni i tyre filantropik kishte marrë donacione modeste nga jashtë, ndërkohë që nuk kanë reaguar për marrëveshjet miliardëshe të Trumpit me vendet e Gjirit, apo kur investitori i kriptomonedhave Justin Sun, i akuzuar për mashtrim financiar, arriti të ndalte hetimin e autoritetit financiar amerikan SEC pasi bleu kriptomonedha të Trumpit me vlerë 40 milionë dollarë, heshtin edhe këtë herë.
Arsyeja është e qartë, pasi Trump ka treguar edhe këto ditë, përmes zgjedhjeve paraprake, se mund t’i japë fund karrierës politike të kujtdo në të djathtë që guxon ta kundërshtojë../CorrieredellaSera
Burimi: opinion.al
