Tre persona në anijen turistike të goditur nga shpërthimi i hantavirusit do të evakuohen në orët në vijim, ka thënë Ministria e Shëndetësisë e Kepit të Gjelbër.
Personeli mjekësor nga vendi që hipi në anije ka vlerësuar se të tre janë klinikisht të qëndrueshëm.
Autoritetet e Kepit të Gjelbër thanë se dy ambulanca ajrore do të ndihmojnë me evakuimet, njëra prej të cilave është tashmë në vend.
Lajmi vjen pasi Organizata Botërore e Shëndetësisë tha se mund të ketë ndodhur një transmetim nga njeriu te njeriu midis njerëzve në anije.
Deri më tash, tre persona kanë vdekur dhe disa të tjerë janë sëmurë, raporton CNN.
“Ne e dimë që disa nga rastet kishin kontakt shumë të ngushtë me njëri-tjetrin dhe sigurisht transmetimi nga njeriu te njeriu nuk mund të përjashtohet, kështu që si masë paraprake kjo është ajo që po supozojmë”, u tha gazetarëve Dr. Maria Van Kerkhove, drejtoreshë e OBSH-së për përgatitjen dhe parandalimin e epidemive dhe pandemive.
Megjithatë, autoritetet shëndetësore kanë theksuar se shpërthimi nuk përbën një rrezik më të gjerë për shëndetin publik.
Pothuajse, 150 persona, përfshirë 17 amerikanë, mbeten të bllokuar në MV Hondius, i cili aktualisht është i ankoruar në brigjet e Praias, kryeqytetit të Kepit të Gjelbër, një komb arkipelag pranë brigjeve perëndimore të Afrikës.
Shtatë raste të hantavirusit, një sëmundje e rrallë që zakonisht shkaktohet nga kontakti me urinën, jashtëqitjet ose pështymën e brejtësve të infektuar, janë identifikuar deri më tani. Sipas OBSH-së dy prej tyre janë konfirmuar dhe pesë të dyshuara.
Një çift holandez dhe një shtetas gjerman kanë vdekur, ndërsa një shtetas britanik mbetet në kujdes intensiv në Afrikën e Jugut.
Burimi: botasot.info
