Që prej orëve të para të mëngjesit të sotëm, banorët e zonës së “5 Majit” në Tiranë krijuan një kordon në mënyrë që të mos lejonin shembjen e banesave të tyre.
Banorët janë përplasur me forcat e policisë, pasi këto të fundit kanë tentuar t’i shpërndajnë.
Në pamjet e siguruara nga Euronews Albania shfaqen momentet kur gratë përplasen me policët.
Në këtë zonë pritet të shemben 400 banesa si pjesë e një projekti rindërtimi, derisa shumica e banorëve nuk janë dakord me kontratat e dhëna nga bashkia.
Ata e quajnë këtë proces një vjedhje të pronës private.
Një pjesë e tyre nuk kanë pranuar as bonusin e qirasë të ofruar nga Bashkia e Tiranës, pasi sipas tyre është në vlerë të vogël.
