Sulm masiv rus ndaj Ukrainës, 11 të vdekur

Sulmet ruse kanë shkaktuar të paktën 11 viktima në mbarë Ukrainën, katër prej tyre në Kiev, duke shënuar një nga sulmet më të mëdha të Moskës në muajt e fundit.

Dhjetëra të tjerë u plagosën, përfshirë disa fëmijë, pas sulmeve ajrore gjatë natës që goditën ndërtesa banimi, ndërsa ekipet e emergjencës po kërkonin për të mbeturit nën rrënoja në Kiev, pas shembjes së një godine 9-katëshe.

Raketat dhe dronët goditën kryesisht Kievin, qytetin qendror Dnipro dhe qytetet lindore Poltava, Kharkiv dhe Zaporizhzhia. Alarmet për sulme ajrore u aktivizuan në pjesën më të madhe të Ukrainës në orët e para të së martës.

Sulmet vijnë pasi presidenti i Ukrainës Volodymyr Zelensky përsëriti të hënën paralajmërimet për një sulm të madh të mundshëm rus dhe u bëri thirrje banorëve t’u kushtojnë vëmendje të veçantë alarmeve ajrore.

“Paralajmërimet e inteligjencës për sulme ruse mbeten në fuqi. Një sulm masiv është i mundshëm, ata e kanë përgatitur një të tillë,” tha Zelensky.

Javën e kaluar Rusia tha se do të synonte qendrat ushtarake dhe ato të vendimmarrjes në Kiev, dhe u kërkoi të huajve të largohen nga qyteti, në atë që e cilësoi si përgjigje ndaj një sulmi të qëllimshëm ukrainas ndaj një konvikti në Starobilsk.

Në atë kohë, Shtabi i Përgjithshëm i Forcave të Armatosura të Ukrainës tha se kishte kryer një sulm pranë Starobilsk në natën e 21–22 majit, por këmbënguli se kishte goditur një njësi ushtarake ruse.

Kievi tha se kërcënimet e Rusisë ishin “shantazh i paturpshëm” dhe u bëri thirrje aleatëve të rrisnin presionin ndaj Moskës.

Që nga përfundimi i armëpushimit të shkurtër në maj, Rusia ka ndërmarrë disa valë sulmesh me raketa dhe dronë ndaj Kyiv, përfshirë goditje në një bllok banimi që vranë 24 persona, mes tyre tre fëmijë.

Një sulm ukrainas me dron në rajonin e Moskës vrau tre persona, në atë që Zelensky e quajti një përgjigje “plotësisht të justifikuar” ndaj sulmeve ruse.