Dy persona kanë humbur jetën dhe një tjetër është plagosur pas rënies së një shkëmbi në rajonin Kapadokia në Turqi.
Sipas autoriteteve vendore, aksidenti ndodhi pas reshjeve të dendura të shiut që përfshinë zonën.
Guvernatori i provincës Nevşehir, Hüseyin Aksoy, deklaroi se shkëmbi u shkëput në orën 15:15 me orën lokale, duke përmendur reshjet e dendura si shkakun e ngjarjes.
Fragmente shkëmbi nga një prej formacioneve, të njohura si “oxhaqet e zanave”, ranë mbi njerëz pranë një muzeu në natyrë në qytezën Göreme.
Ekipet e shpëtimit që mbërritën në vendngjarje gjetën dy persona të vdekur dhe një të plagosur. Guvernatori konfirmoi se kërkimet në vendin e aksidentit vazhdojnë. Kombësia e viktimave ende nuk është bërë e ditur.
Kapadokia është një destinacion i njohur në mbarë botën, i famshëm pikërisht për formacionet unike të shkëmbinjve vullkanikë.
Burimi: botasot.info
