Shërbime për aftësinë ndryshe, Ministrja e Shëndetësisë Sala viziton qendrën multifunksionale në Librazhd

Qendrën multifunksionale për personat me aftësi të kufizuara, e ngritur përmes mekanizmit të Fondit Social në Librazhd, e vizitoi ministrja e Shëndetësisë, Evis Sala, dhe kryetari i bashkisë, Mariglen Visha.

Ministrja Sala vlerësoi rëndësinë e shërbimeve komunitare të integruara, të cilat mbështesin jo vetëm fëmijët me aftësi të kufizuara, por edhe familjet e tyre, përmes kujdesit të specializuar dhe ekipeve multidisiplinare.

“Angazhimi ynë është i qartë: të zhvillojmë shërbime cilësore, të aksesueshme dhe të qëndrueshme në komunitet, që i përgjigjen nevojave të fëmijëve me aftësi të kufizuara dhe familjeve të tyre, duke përfshirë si ofrimin e kujdesit në ambientet e qendrave, ashtu edhe në banesë”, theksoi ministrja Sala.

Sala theksoi se përmes mekanizmit të Fondit Social po ndërtohet një sistem i integruar shërbimesh dhe po forcohet partneriteti me bashkitë dhe organizatat e shoqërisë civile, me synimin që askush të mos mbetet pas.

Në Qendrën Multifunksionale në Librazhd ofrohen shërbime si fizioterapia, logopedia, terapia e zhvillimit, terapia në grup, aktivitetet psiko-sociale dhe mbështetja për familjet. Përmes Fondit Social, deri më sot janë mbështetur 39 shërbime komunitare dhe të specializuara për personat me aftësi të kufizuara në të gjithë vendin.