Zëvendëskryeministri i parë, Bekim Sali, ka marrë pjesë sonte në një tubim elektoral në Tetovë, ku së bashku me bashkëkryetarët Bilall Kasami dhe Izet Mexhiti, si dhe nënkryetarin Bekim Qoku, kanë mirëpritur Kryetaren e Kuvendit dhe ushtruesen e detyrës së Presidentes së Kosovës, Albulena Haxhiu.
Në njoftimin e tij, Sali theksoi rëndësinë e zgjedhjeve të 7 qershorit në Kosovë, duke i cilësuar ato si vendimtare për të ardhmen e vendit.
“Këto zgjedhje janë jetike dhe tejet të rëndësishme për vazhdimin e punëve të mira në Kosovë, për forcimin e institucioneve dhe për shtrirjen e plotë të sovranitetit në çdo cep të vendit”, deklaroi Sali.
Ai u bëri thirrje qytetarëve të Kosovës që të mbështesin vazhdimësinë e proceseve shtetformuese dhe të zhvillimit institucional.
“Më 7 qershor, duke votuar numrin 116, votoni për siguri, sovranitet, zhvillim dhe vazhdimësi të qeverisjes së përgjegjshme në shërbim të qytetarëve dhe të ardhmes së Kosovës”, theksoi zëvendëskryeministri i parë.
Tubimi u mbajt në prag të zgjedhjeve parlamentare në Kosovë, ndërsa pjesëmarrësit shprehën mbështetje për vazhdimin e politikave që synojnë forcimin e institucioneve dhe zhvillimin e vendit.
Burimi: alfax.mk
