Përfaqësuesi i Lartë i BE-së, Joseph Borrell, tha se Bashkimi Evropian dënon vendimin e Rusisë për t’u tërhequr nga marrëveshja e ndërmjetësuar nga OKB-ja që garantonte kalim të sigurt për anijet që transportonin eksporte jetike të grurit nga Ukraina.
Në një deklaratë me shkrim në emër të BE-së, Borrell thekson se vendimi i pajustifikuar i Rusisë për të pezulluar pjesëmarrjen e saj në iniciativën e OKB-së parandalon eksportin e drithit, duke përshkallëzuar në këtë mënyrë krizën globale të ushqimit.
Ndër të tjera Borrell nënvizon se Rusia është i vetmi vend përgjegjës për krizën globale të sigurisë ushqimore të shkaktuar nga lufta e saj e paprovokuar dhe e pajustifikuar kundër Ukrainës.
Që nga fillimi i luftës së agresionit të Rusisë kundër Ukrainës, Rusia ka përdorur ushqimin dhe urinë si armë. Veprimet e qëllimshme të Rusisë, duke përfshirë shkatërrimin e stoqeve, ndalimin e prodhimit dhe vendosjen e kufizimeve të kuotave në eksportet e saj të ushqimit kanë përkeqësuar krizën globale të sigurisë ushqimore, vëren Joseph Borrell.
Burimi: GAZETA.MK
