Këtë titull shkrimi e kam huazuar nga libri i Faik Konicës “Shqipëria si m’u duk”, (vepra, vëll.2). Ajo pjesë që do të shkëpusim nga ky vëllim i Konicës është tipik me ngjarjen që ndodhi në Parlamentin Shqiptar në datën 11 Maj 2022, kur një grup deputetësh të PD paraqiti për miratrim një rezolutë për rë dënuar genocidin e Serbisë në Bosnjë-Hercegovinë në vitet ’90-të të shekullit që lamë pas, të cilën gjithë deputetët e mazhorancës socialiste e kundërshtuan masivisht, madje edhe duke manifestuar edhe veprime qesharake. Kjo ndodhi pikërisht për atë cilësim që bën Konica, prandaj dhe ranë në faj të rëndë politik e diplomatik, por edhe kombëtar. Ata ranë në atë faj të rëndë për të vetmen arsye, se çështjet i gjykojnë duke u nisur zakonisht nga respekti personal që kanë për deputetë të veçantë të opozitës, në rastin konkret ndaj Sali Berishës, i cili ishte një prej deputetëve që e propozuan atë rezolutë.
Mirëpo, edhe pse socialistët e dinë që Sali Berisha është politikan i afirmuar por dhe shumë dinak, përsëri ata ranë në kurthin e tij, duke mos e ndëshkuar Serbinë për genocidin e bërë prej saj në Bosnjë-Hercegovinë.
Pse them se ranë në kurthin e Berishës? Të gjithë jemi dëshmitarë se po atë ditë, më 11 Maj 2022, një rezolutë të tillë do ta miratonte edhe Këshilli i Sigurimit i OKB. Kuptohet që Berisha e ka ditur këtë fakt dhe, për t’i thënë Këshillit të Sigurimit se, ne Shqipëria e kemi dënuar më herët se ju atë genocid, prandaj e ndërmori atë veprim.
Po pse më herët? Sepse ne jemi 6 (gjshtë) orë më përpara se SHBA. Kështu që, kur të mblidhej Këshilli i Sigurimit, Shqipëria do kishte publikuar botërisht 6 orë më herët denoncimin e genocidit serb në Bosnjë-Hercegovinë.
Por, duke qenë se deputetët e PS –Rilindjes janë thjeshtë robotë, thnë ndryshe njerëz-makina, sikundër I ka cilësuar dikur Konica, në vend që ta miratonin atë rezolutë, bojkotuan seancën parlamentare! Mirëpo, 6 orë më pas se deputetët e PS-Rilindjes e hodhën poshtë miratimin e asaj rezolute, anëtari shqiptar në Këshillin e Sigurimit e dënoi rëndë atë genocid në emër të Shtetit Shqiptar. Që do të thotë se Shqipëria doli me dy fytyra politiko-diplomatike, përveç që u thellua ftohja midis popullit shqiptar në Republikën e Shqipërisë me atë në Republikën e Kosovës.
Dhe ky demonstrim prej manekinësh nga mazhoranca socialisto-rilindase është tipik sipas përshkrimit që u ka bërë Faik Konica deputetëve dhe administratës së Shqipërisë në vitin 1929:
“Dikush mund t’i mbrojë robotët e zyrave të Shqipërisë, duke thënë se këta njerëz-makina kanë të paktën një të mirë: – Janë të bindur. Po një mbrojtje e tillë s’mbron gjësendi, se mësimet e historisë janë sheshit për të treguar se të bindurit posi dru, s’bën dobi fare. Vetëm të bindurit me kuptim, të bindurit me shpirt e me zemër, shpëton një vend, lartëson një regjim e një komb.
Jo, kthejeni si të doni, nuk është puna që një vend si Shqipëria të rrojë, të zhvillohet, të vejë përpara, vetëm me rregulla: ka rrojtur mijëra vjet pa pasur rregulla, sepse ka pasur personalitete të gjalla që mblidheshin rreth e rrotull një personaliteti më të gjallë.
S’kam asnjë çast qëllimin t’ua ngarkoj ministrave të kabinetit fajin e robotizmës që mbretëron në zyrat e sotme të Shqipërisë. Faji duket se është gjer në një pikë i rasteve, po ca më tepër, i një drejtimi të lajthitur. Disa nga ministrat m’u dukën njerëz të zotët, dhe të gjithë kuptova se kanë qëllime të mira. Ata e gjetnë, nuk e krijuan, këtë sistem të vdekur. Dhe shpresa ime, duke shfaqur ca mendime, është të kthej sytë e tyre në një drejtim tjetër. Po të bëjnë mundimin ta këqyrin problemin e zyrave nga pikëpamja që shënova më sipër, mund që paskëtaj shakaja e rregulloreve të marrë fund, dhe ndoshta të përpiqen të shtien themelet e një sistemi të themeluar mbi ndërgjegjen, kuptimin, dhe zellin e gjallë të zyrtarëve. Me një frymë të re të këtillë do t’i bëjnë një shërbim të vërtetë edhe Mbretit edhe kombit të cilët duhet të jenë të pandarë.”
Me një fjalë, deputetët socialist-rilindas, për inat të Berishës e bënë si ajo nusja që për inat të vjehrës shkoi e fjeti me mullixhiun, dhe mullixhiu e çnderoi, sikundër këta deputetë e çnderuan Shqipërinë atë ditë, (fjetën me mullixhiun Serbi), duke e nxjerrë me dy fytyra, (dy vendime të kundërt).
