Presidenti francez Emmanuel Macron ka bërë të ditur se Franca mbështet ndërprerjen e konflikteve në Lindjen e Mesme dhe rikthimin e bisedimeve diplomatike mes palëve, duke kërkuar respekt për të gjitha shtetet e rajonit.
Nga Jerevani, gjatë një vizite zyrtare në Armeni, ai ka thënë se do të zhvillojë bisedime edhe me presidentin e Iranit.
Sipas tij, zgjidhja e situatës kalon përmes rihapjes së Ngushticës së Hormuzit dhe garantimit të lirisë së lundrimit në këtë zonë strategjike.
Macron ka vlerësuar se çdo veprim ushtarak i njëanshëm rrezikon të përshkallëzojë më tej konfliktin dhe nuk sjell stabilitet në rajon.
Në lidhje me marrëdhëniet tregtare me Shtetet e Bashkuara dhe kërcënimet për rritje tarifash, ai ka bërë të ditur se Franca mbështet stabilitetin e tregtisë ndërkombëtare sipas rregullave të Organizatës Botërore të Tregtisë.
Ai ka shtuar se Bashkimi Evropian ka mundësi të reagojë në rast të vendosjes së tarifave të reja nga SHBA, por në këtë periudhë, sipas tij, vendet aleate duhet të fokusohen më shumë te bashkëpunimi sesa te konfliktet tregtare.
Burimi: botasot.info
