Plotësisht i dehur dhe nuk ndihmoi të miturit/ Gjykata e Durrësit jep vendimin, Nikoll Radaçi përballet me burgun

Gjykata e Durrësit ka vendosur “arrest me burg” për 57-vjeçarin Nikoll Radaçi, i akuzuar për një aksident tragjik që ndodhi më 3 maj në lagjen 15 të qytetit, ku humbën jetën dy fëmijë dhe u plagos një tjetër.

Sipas prokurorisë, ngjarja ka ndodhur rreth orës 14:00 në rrugën “Ohri”, kur drejtuesi i mjetit ka humbur kontrollin mbi automjetin e tij “Mercedes Benz” dhe është përplasur me tre të mitur që ndodheshin në trotuar.

Si pasojë e përplasjes, kanë ndërruar jetë në vend dy fëmijë, 9 dhe 12 vjeç, ndërsa një tjetër 8 vjeç është transportuar në Spitalin e Traumës në Tiranë në gjendje të rëndë.

Hetimet tregojnë se drejtuesi i mjetit ka qenë nën ndikimin e alkoolit, me nivele të larta të konstatuara në dy testime të kryera pas aksidentit.

Sipas prokurorisë, pas ngjarjes ai është larguar nga vendi i aksidentit pa u dhënë ndihmë fëmijëve, por më vonë është ndaluar nga policia dhe ka pranuar përfshirjen në ngjarje.

Para hetuesve, ai ka pretenduar se ka humbur kontrollin pasi është detyruar të devijojë për të shmangur një mjet tjetër që i ka dalë papritur në rrugë.

Prokuroria e Durrësit ka ngritur ndaj tij tre akuza: shkelje të rregullave të qarkullimit me pasojë vdekjen, drejtim mjeti në gjendje të dehur dhe largim nga vendi i aksidentit.

Gjykata ka pranuar kërkesën e prokurorisë, duke caktuar masën e sigurisë “arrest me burg”, ndërsa hetimet po vijojnë për të zbardhur plotësisht rrethanat e ngjarjes.