Ditën e Marte PayPal tha se përdoruesit e kriptomonedhave tashmë mund të transferojnë fondet e tyre nga platforma, një funksionalitet i shumëpritur që do ta shndërronte platformën në një shërbim të ngjashëm me platformat popullore të tregtimit të tyre.
“Duke filluar nga dita e sotme PayPal do të mundësojë transferimin e kriptomonedhave mes PayPal dhe portofolëve dhe bursave të tjera të kriptomonedhave,” tha gjiganti i shërbimeve financiare.
Transferimi i kriptomonedhave në platformën crypto të PayPal do të fillojë të ofrohet nga dita e sotme dhe në dy javët në vazhdim do të jetë e disponueshme për të gjithë përdoruesit në SHBA.
PayPal filloi të ofronte shitblerjen e kriptomonedhave në 2020-ën ku përdoruesit mund të blinin, shisnin dhe mbanin katër prej tyre: Bitcoin, Ethereum, Bitcoin Cash dhe Litecoin.
Megjithatë ishte e pamundur që kriptomonedhat të transferoheshin në destinacione të jashtme si MetaMask, Coinbase apo portofolë të ngjashëm.
Mbështetja e kriptomonedhave nga PayPal nuk ka bërë asnjë hap pas pavarësisht spirales financiare që kompania ka pësuar në muajt e fundit me zhvlerësimin e aksioneve.
Kontributi i kriptomonedhave në financat e PayPal është i paqartë duke qenë se kompania nuk jep shifra të përdorimit të shërbimit të kriptomonedhave. Duke pasur parasysh trendin në kompanitë si Coinbase dhe Robinhood, volumi i transaksioneve në kriptomonedha duhet të ketë rënë edhe në PayPal. /PCWorld Albanian
