Organizatat e dala nga lufta e Ushtrisë Çlirimtare të Kosovës do të organizojnë të enjten një aktivitet simbolik para zyrës së Bashkimit Evropian në Prishtinë, për të shprehur pakënaqësinë e tyre lidhur me procesin gjyqësor ndaj ish-krerëve të UÇK-së në Hagë, në gjashtëvjetorin e arrestimit të tyre.
Nënkryetari i Organizatës së Veteranëve të Luftës së UÇK-së, Gazmend Syla, në një konferencë për media tha se aktiviteti do të mbahet në orën 12:00, ku përfaqësuesit e tri organizatave do të përcjellin mesazhe publike në shenjë solidariteti me ish-krerët e UÇK-së.
Syla bëri të ditur se kanë kërkuar edhe nga Asociacioni i Komunave të Kosovës që kryetarët dhe administratat komunale të dalin para objekteve të komunave në shenjë solidariteti.
Syla flet për aktivitetin e OVL UÇK
“Në rastin e këtij vjetori, të arrestimit të ish-krerëve të Ushtrisë Çlirimtare të Kosovës, ne veteranët, bashkë me invalidët dhe familjet e dëshmorëve, do të organizojmë një aktivitet simbolik për të shprehur pakënaqësinë tonë ndaj këtij procesi gjyqësor në Hagë dhe për të shprehur solidaritetin me ish-krerët e UÇK-së. Aktiviteti do të mbahet nesër në orën 12:00 para zyrës së Bashkimit Evropian në Prishtinë, ku përfaqësuesit e këtyre 3 organizatave të ndara nga lufta e UÇK-së do të përcjellin mesazhe publike përmes të cilave do të përcjellim qëndrimin dhe shqetësimet tona lidhur me këtë proces. Njëkohësisht, ne kemi kërkuar nga Asociacioni i Komunave të Kosovës, me ftesë që nesër, në të njëjtën orë, kryetarët e komunave, së bashku me administratat komunale, të dalin para objekteve të komunave të tyre në shenjë solidariteti dhe për të shprehur, pra, këtë pakënaqësi. Ne besojmë që solidariteti me ish-krerët e UÇK-së dhe kërkesat për një proces të drejt gjyqësor janë çështje që prekin kujtesën tonë historike dhe besimin e qytetarëve në drejtësi”, tha Syla.
Ai foli edhe për zhgënjimin e lidhur me kthimin e ligjit për dhomat e specializuara, duke thënë se presin reflektim nga deputetët e Kuvendit të Kosovës.
Syla flet edhe për kthimin e ligjit për dhomat e specializuara
“Ne e kemi bërë publike qëndrimet tona lidhur me kthimin e ligjit. Për neve ka qenë tepër e papranueshme. Ju e dini se u ndërtua një kauzë për këtë ligj, që u votua ai ligj, edhe gjithë ajo kauzë me kthimin e tij në njëfarë forme ra poshtë. Ne jemi shumë të zhgënjyer me këtë akt, prandaj po presim reflektimin edhe një herë të deputetëve, të shohim se si do të ndodhë me këtë ligj. Jemi të bindur se çfarëdo ligji që vjen pas tij do të jetë më i dobët se ky që ka qenë, prandaj do të mbetet në përgjegjësinë e institucioneve tona, përkatësisht Kuvendit të Republikës së Kosovës, por ne kemi shprehur një zhgënjim të madh lidhur me këtë proces. Jemi tepër të pakënaqur me atë që ka ndodhur. Do ta shohim tash e tutje se si do të veprojë Kuvendi i Republikës së Kosovës”, tha ai.
Për rastin e dytë në Hagë që do mbahet me 17 nëntor, OVL UÇK nuk pret dënim të drejtë.
Kjo organizatë nuk ka besim më në Gjykatën Speciale në Hagë.
Syla flet për procesin e dytë në Hagë me 17 nëntor
“Kemi qenë kundër, vazhdojmë të jemi kundër. E kam parë që kjo gjykatë, kur nuk u përmend kurrë më raporti i Dick Marty në akuzë, ne e kemi ditur që ka dalë nga misioni i saj. Prandaj, çfarëdo që vjen nga kjo gjykatë, ne e dimë që është dashakeqëshe, edhe kur është themeluar me ndonjë dënim. Asnjëherë me nxjerrë drejtësi. Prandaj jemi në pritje edhe të asaj të madhkeqes, qoftë edhe eventualisht me ndodhë ndonjë dënim prapë, sepse nuk i besojmë më kësaj gjykate”, tha Syla.
Ish-krerët e UÇK-së janë dënuar me 81 vjet burgim në shkallën e parë nga Dhomat e Specializuara në Hagë.
Burimi: botasot.info
