Protesta e ditës së 68-të në bulevardin para Kryeministrisë u mbyll pas fjalimeve të aktivistëve dhe qytetarëve, që deklaruan se nuk do largoheshin nga sheshi deri në dorëheqjen e qeverisë dhe kryeministrit Edi Rama.
Nën thirrjet “Rama jepe dorëheqjen” dhe “Ndryshim sistemi”, ata nisën marshimin tradicional në rrugët e kryeqytetit.
Itinerari këtë herë ishte nga bulevardi në drejtim të Universiteteve dhe më tej ish-Bllokut.
Qytetarët shprehën revoltën e tyre me parulla, pankarta dhe thirrje të pandërprera në kor, ku slogani kryesor mbetej dorëheqja e kryeministrit Edi Rama.
“Edi Rama, dil në bulevard, Atdheu është i yni dhe jo biznes privat”, ishte një nga thirrjet e tyre.
“Rama o tradhtar, jep dorëheqjen sa më parë”, “Ju erdhi fundi”, “Ndryshim sistemi”, “Rama në burg, Berisha në burg”, “Ju me gaz, ne me vezë, Edi Rama i pabesë”, ishin edhe sloganet e tjera të marshimit.
Nën thirrjet “Shqipëria kërkon revolucion”, qytetarët marshuan fillimisht nga sheshi “Skënderbej” mbrëmjen e sotme, drejt Kryeministrisë, për protestën e 68-të radhazi dhe rezistencën popullore për ndryshimin e sistemit dhe rrëzimin e qeverisë.
Mes thirrjeve të tjera ishin edhe “Shqipëri etnike”, “Shqipëria e shqiptarëve” apo “Opozitë e shitur”.
Burimi: botasot.info
