Ministri i Jashtëm i Maqedonisë së Veriut, Timcho Mucunski, ka deklaruar se NATO është “më e fortë se kurrë”, pavarësisht kritikave të vazhdueshme të presidentit amerikan Donald Trump ndaj aleatëve europianë.
Në një intervistë për Euronews, Mucunski tha se administrata Trump ka ndikuar në forcimin e aleancës ushtarake dhe rritjen e angazhimit të vendeve anëtare për mbrojtjen.
“Sipas meje, falë Presidentit Trump, Marco Rubio dhe gjithë aparatit të politikës së jashtme amerikane, NATO është më e fortë se sa ka qenë ndonjëherë”, deklaroi ai.
Mucunski iu referua samitit të NATO-s në Hagë, ku vendet anëtare ranë dakord të rrisin shpenzimet për mbrojtjen në 5% të PBB-së deri në vitin 2035.
Ai e cilësoi këtë si një agjendë “ambicioze, por të domosdoshme”, duke përmendur kërcënimet që vijnë nga agresioni rus në Ukrainë, si edhe tensionet në Indo-Paqësor dhe Lindjen e Mesme.
“Presidenti Trump i dha NATO-s një kambanë zgjimi”, u shpreh ministri maqedonas.
Deklaratat e tij bien në kontrast me qëndrimet në shumë kryeqytete europiane, ku raportet me Trump janë konsideruar të tensionuara. Presidenti amerikan ka kritikuar shpesh vendet europiane për nivelin e shpenzimeve ushtarake dhe ka kërcënuar me reduktim të pranisë ushtarake amerikane në Europë.
Megjithatë, Mucunski vlerësoi anëtarësimin e Maqedonisë së Veriut në NATO në vitin 2020, duke thënë se aleanca i ka sjellë vendit stabilitet në një rajon që ai e cilësoi “shumë të paqëndrueshëm”.
Duke folur për integrimin europian, Mucunski tha se Bullgaria mbetet pengesa kryesore në rrugën e Maqedonisë së Veriut drejt Bashkimit Evropian.
Mosmarrëveshjet mes dy vendeve lidhen me çështje identitare dhe gjuhësore, ndërsa Sofja kërkon ndryshime kushtetuese për njohjen e pakicës bullgare në Maqedoninë e Veriut.
“Shpresoj që Bullgaria të njohë mundësitë që ekzistojnë dhe të hapë dialog me ne”, deklaroi ai.
Ministri paralajmëroi gjithashtu për ndikimin “keqdashës” të Rusisë dhe Kinës në rajon, duke theksuar se kërcënimet hibride shtohen aty ku rritet zhgënjimi dhe bie besimi te proceset integruese.
Sipas një sondazhi të janarit 2026, rreth 70% e qytetarëve të Maqedonisë së Veriut do të votonin pro anëtarësimit në BE, megjithëse shumë prej tyre nuk besojnë se dera e unionit do të hapet realisht për vendin.
