Debutimi i fundit i Firefox 134 sjell disa përmirësime tek shfletuesi, kryesisht tek luajtësi i videove në Windows dhe mbështetje për touchpad-et në Linux.
Gjithashtu përmban edhe disa përditësime sigurie. Firefox ESR dhe Tor Browser gjithashtu janë përditësuar.
Me këtë përditësim Firefox tani është në gjendje të luajë video HEVC (H.265) në kompjuterët Windows me akselerim harduerik. Në Linux Firefox tani mbështet gjestin e ndalimit në touchpad – rrotullimi në ueb mund të ndalohet duke vendosur dy gishtat mbi touchpad.
Motori i kërkimit Ecosia tani është i disponueshëm në Austri, Belgjikë, Itali, Spanjë, Suedi, Zvicër dhe Holandë.
Së fundi me këtë version janë adresuar të paktën 11 probleme sigurie. Mozilla ka planifikuar ta lançojë përditësimin tjetër Firefox 135 më 4 Shkurt 2025.
/PCWorld Albanian
Burimi: pcworld.al
