Ministri grek i Mbrojtjes së Qytetarëve, Notis Mitarakis, ka dhënë dorëheqje për “arsye personale”, transmeton Anadolu.
Dorëheqja e tij vjen derisa Greqia po lufton me zjarret që nga java e kaluar që shkaktuan evakuimin e mijëra njerëzve nga zona të ndryshme.
Agjencia greke e lajmeve AMNA tha se kryeministri Kyriakos Mitsotakis ka pranuar dorëheqjen e ministrit Mitarakis.
Ministria e Mbrojtjes së Qytetarëve është përgjegjëse për shërbimet e sigurisë publike të vendit, përfshirë shërbimet e zjarrit, policinë dhe Sekretariatin e Përgjithshëm për Mbrojtjen Civile.
AMNA raportoi se në vend të tij është emëruar zv.ministri i Arsimit, Çështjeve Fetare dhe Sportit, Yiannis Oikonomou.
Ndërkohë, mediat lokale raportojnë se Yiannis Vroutsis është emëruar zv.ministër i Arsimit, Çështjeve Fetare dhe Sportit.
Ministrat e rinj pritet të bëjnë betimin gjatë ditës në Pallatin Presidencial.
