Kurti nis takimet në Oslo, çfarë po u kërkon norvegjezëve?

Kryeminsitri Albin Kurti ka nisur takimet në Norvegji. Të parën bashkëbiseduese të hënën atje e ka pasur Ministren e Punëve të Jashtme të Norvegjisë  Anniken Huitfeldt. Ai ka folur edhe për rritjen e bashkëpunimit mes dy vendeve, por për nikoqirët ka pasur edhe kërkesa.

Sipas njoftimit të Zyrës së Kryeministrit, Kurti në këtë shtet skandinav po qëndron bashkë me Ministrin e Mbrojtjes, Armend Mehaj, zëvendësministren e Arsimit, Shkencës, Teknologjisë dhe Inovacionit, Edona Maloku Bërdyna dhe Zëvendësministren e Punëve të Jashtme dhe Diasporës, Liza Gashi, ndërsa në takim është folur rreth mundësisë “për të forcuar dhe thelluar marrëdhëniet dypalëshe”.

“Kryeministri Kurti shprehu mirënjohjen për mbështetjen e vazhdueshme që shteti i Norvegjisë ia ka dhënë Republikës së Kosovës, veçanërisht për sigurinë dhe zhvillimin socio-ekonomik të vendit tonë, si dhe mbështetjen e Norvegjisë për anëtarësimin e Kosovës në organizata ndërkombëtare” citohet Kurti në njoftimin e ZKM.

Kryeministri Kurti po ashtu ka shprehur interesimin për të rritur bashkëpunimin ekonomik dhe marrëdhëniet tregtare mes Kosovës dhe norvegjisë.

Ndërkohë, temë e pashmangshme ka qenë edhe situata në Ukrainë.

“U bisedua edhe për invazionin e agresionin rus në Ukrainë dhe pasojat që ka shkaktuar si në ekonomi po ashtu edhe në siguri, në Evropë e posaçërisht në rajonin e Ballkanit Perëndimor. Kryeministri Kurti theksoi se Kosova është rreshtuar krahas botës demokratike, duke ju bashkuar sanksioneve kundër Rusisë, si dhe duke shprehur gatishmërinë për të pranuar 20 gazetarë e për të strehuar deri në 5000 refugjatë ukrainas” thekson njoftimi.

Kurti ndërkaq në Twitter ka publikuar edhe fotografi të takimit me Terje Aasland Ministrin e Energjisë dhe Naftës.

“Burimet natyrore u përkasin njerëzve dhe legjislacioni duhet ta pasqyrojë atë; një besim që e ndamë bashkë me Ministrin e Energjisë dhe Naftës, Terje Aasland. Ndërsa ne hapim strategjinë e re për energjinë për dekadën e ardhshme, unë e ftova atë të eksplorojë mundësitë e investimeve në Kosovë”./Ekspress/

GAZETA.MK

Story i mëparshëm

Komuna e Prishtinës iu kërkon qytetarëve të largojnë antenat satelitore nga banesat e tyre

Story i radhës

Zihen me grushta një mes të rrugës, shoqërohen në polici dy të rinjtë

Të fundit nga

AlbanianMacedonianEnglish