Kryetari i Komunës së Butelit, Darko Kostovski, sot (12 qershor 2026) ndau gjithsej 57 bursa për nxënësit më të suksesshëm të shkollave fillore në territorin e komunës.
Nën moton “Me zemër mësoj, me dije arrij sukses”, pushteti lokal vazhdoi traditën e shpërblimit dhe mbështetjes së nxënësve që kanë arritur rezultate të larta në procesin arsimor.
Sipas njoftimit të komunës, 11 nxënësit e shpallur më të mirët e gjeneratës në tre gjuhë mësimore – maqedonisht, shqip dhe turqisht – morën bursa në vlerë prej 12 mijë denarësh.
Ndërkohë, nxënësve më të dalluar të klasave të pestë, të gjashtë, të shtatë dhe të tetë, po ashtu në të tre gjuhët mësimore, u janë ndarë bursa në vlerë prej 6 mijë denarësh.
Nga Komuna e Butelit theksojnë se vazhdojnë të investojnë në arsim dhe të promovojnë politika për mbështetjen e nxënësve më të mirë.
