Kina dënoi ashpër sulmet e përjetuara kohët e fundit kundër Kuranit, transmeton Anadolu.
Zëdhënësi i Ministrisë së Punëve të Jashtme të Kinës, Wang Wenbin, në një konferencë për media foli rreth projekt-rezolutës lidhur me fyerjet dhe sulmet kundër Kuranit të cilat janë diskutuar në seancën e posaçme urgjente të Këshillit të Kombeve të Bashkuara për të Drejtat e Njeriut.
Duke theksuar se dënojnë ashpër sulmet kundër Kuranit, Wang tha se “e ashtuquajtura liri e shprehjes” nuk mund të përdoret për të krijuar konflikte mes qytetërimeve. Ai theksoi se mbështesin seancën urgjente të Këshillit të OKB-së për të Drejtat e Njeriut dhe se fetë dhe besimet e ndryshme duhet të respektohen. Wang më tej nënvizoi se ata “janë kundër të gjitha formave të islamofobisë”.
Në kryeqytetin e Suedisë, Stockholm, Salwan Momika me origjinë nga Iraku, dogji Kuranin nën mbrojtjen e policisë para xhamisë në Stockholm në ditën e parë të Kurban Bajramit. Në seancën e posaçme urgjente të Këshillit të OKB-së për të Drejtat e Njeriut më 12 korrik me thirrjen e bërë nga Organizata e Bashkëpunimit Islam (OBI) u diskutua projekt-rezoluta i OBI-t lidhur me fyerjen dhe sulmet e kryera kundër Kuranit.
Projekt-rezoluta me thirrjen për dënimin e sulmeve me objektiv Kuranin dhe të cilat janë cilësuar si “urrejtje kundër fesë” u paraqit për votim në këshillin me 47 anëtarë. Vendimi i dënimit të sulmeve u mor me 28 vota pro dhe 12 kundër ndërkohë që 7 vende abstenuan.
Vendimet e marra në Këshillin 47 anëtarësh të OKB-së për të Drejtat e Njeriut nuk janë të detyrueshme, por opinioni që del prej tyre ndikon në vendimet e mundshme që do të merren nga parlamentet kombëtare.
Gjithashtu këto vendime janë të rëndësishme edhe në aspektin e formimit të opinionit publik ndërkombëtar.
