Lideri i Lëvizjes Demokratike – pjesë e Lidhjes Europiane për Ndryshim, Izet Mexhiti është deklaruar pas takimit në Prishtinë me kryeministrin e Kosovës, Albin Kurtin, transmeton TV21.
Megjithëse nuk përmend çështjen e presidentit të RMV-së, siç u njoftua në kumestën e Kryeministrisë së Kosovës, Mexhiti bëri të ditur se me Bilallin, Afrimin, Bekimin dhe Arbenin i presin punë dhe përgjegjësi të mëdha.
Mos vallë është ky një hap drejt një koalicioni të përbashkët?
“Sot në Prishtinë, bashkë me Bilallin, Afrimin, Bekimin dhe Arbenin u pritëm nga kryeministri i Kosovës, Albin Kurti dhe kryeparlamentari Glauk Konjufca.
Në një ambient vëllazëror, biseduam për zhvillimet politike në vendet tona, për bashkëpunim i cili do të kontribuojë në avancimin e pozitës së shqiptarëve në Maqedoninë e Veriut, zhvillimin ekonomik të dy vendeve dhe faktorizimin e shqiptarëve në rajon.
Bashkë, na presin punë dhe përgjegjësi të mëdha”, shkroi Mexhiti në Facebook.
Burimi: tv21
