Ka nisur gjykimi për vrasjen e Grei Bihucit, 19-vjeçari që humbi jetën 8 muaj më parë nga goditjet me thikë prej dy bashkëmoshatarëve të tij. Familjarët e autorëve dhe viktimës kërkuan marrjen në hetim edhe të personave të tjerë që ishin prezent në vrasje
Flori dhe Klajdi Muka, dy kushërinjtë që akuzohen për vrasjen e Grei Bihucit, u paraqitën në gjykatë për t’u përballur me gjykimin ndaj tyre.
Nën masa të rrepta sigurie, me policë që patrullonin përreth gjykatës dhe në afërsi të saj, seanca paraprake për vrasjen e 19-vjeçarit u zhvillua në prani të familjarëve të viktimës dhe autorëve.
Këta të fundit i kanë kërkuar prokurorit Petrit Vuka të marrë nën hetim edhe persona të tjerë të paidentifikuar të cilët dyshohet se kanë dhunuar dy kushërinjtë gjatë debatit mes të rinjve.
Dëshmia e të pandehurve Muka, vazhdon të jetë ajo e dhënë menjëherë pas ngjarjes ku u tha se gjate përleshjes mes dy grupeve të të rinjve, autorët nxorën thikën dhe sulmuan bashkëmoshatarët e grupit kundërshtar pa dashur të vrisnin askënd por vetëm për t’u mbrojtur.
Grei sipas tyre, ishte rastësisht viktimë e sulmit.
Avokati i kushërinjve Muka kërkoi ricilësim të akuzës nga “vrasje me paramendim”, në vrasje në rrethana të tjera cilësuese.
Grei Bihuci, nxënës i shkollës “Petro Sota” u vra më 11 mars mes një sherri të bashkëmoshatarëve të tij që kishte nisur për një thikë të blerë on line.
Adoleshentet thanë se thika me të cilën u vra Grei, u ishte dhënë kushërinjve Muka nga një shok i Grei Bihucit.
Kur ai kërkoi t’ia kthenin, adoleshentët nuk pranuan menjëherë. Pas disa ditëve debatesh mes tyre, në 11 mars ata e lanë të takoheshin në qendër të Fierit për të “sqaruar”.
Por debatet nisën sërish dhe dhuna u përshkallëzua deri në përdorimin e thikës për të cilën kishte nisur edhe debati. Kushërinjtë Muka u arrestuan menjëherë pas ngjarjes por personi tjetër që kishte qenë shkak për konfliktin nuk është përfshirë në hetim.
Seanca e radhës për këtë vrasje u caktua për në datën 27 nëntor
Burimi: botasot.info
