Festa falas të Kupës së Botës në Nju Jork: Çdo lagje do të ketë “Fan Fest”

Nju Jork, 28 prill 2026 – Kryetari i Bashkisë, Zohran Mamdani, njoftoi sot se qyteti do të organizojë festa falas për ndjekjen e ndeshjeve të Kupës së Botës 2026 në çdo lagje (borough). Kjo iniciativë synon ta bëjë përvojën e turneut të aksesueshme për të gjithë, pasi pritet që rajoni të presë mbi 1 milion vizitorë gjatë eventit më të madh futbollistik në botë.

“Ne duam të bëjmë gjithçka në fuqinë tonë që tifozët të krijojnë kujtime pa shpenzuar para,” tha Mamdani. “Fillimisht këto evente nuk ishin falas, por loja e botës i përket botës. Prandaj vendosëm që tifozët të mund të shijojnë ndeshjet së bashku pa paguar asnjë dollar.”

“Fan Fest”

Këto festa shumëditore do të përfshijnë transmetim live të ndeshjeve, ushqim lokal, programe kulturore dhe aktivitete argëtuese. Kapaciteti do të ndryshojë sipas vendit; disa mund të presin deri në 10.000 tifozë njëherësh. Ndeshjet zyrtare do të luhen në MetLife Stadium (New Jersey) në qershor dhe korrik.

Vendndodhjet dhe datat sipas lagjeve:

• Bronx: Bronx Terminal Market – 13 dhe 14 qershor
• Queens: Billie Jean King National Tennis Center – 11 deri më 27 qershor
• Manhattan: Rockefeller Center – 6 deri më 19 korrik (përfshirë finalen)
• Brooklyn: Brooklyn Bridge Park – 13 qershor deri më 19 korrik
• Staten Island: Staten Island University Hospital Community Park – 29 qershor deri më 2 korrik

Guvernatorja Kathy Hochul njoftoi gjithashtu se do të ketë festa falas edhe jashtë qytetit, në Stony Brook University (Long Island) më 12 qershor dhe në Kensico Dam Plaza (Westchester) më 19 korrik.

Për më tepër, autoritetet njoftuan se lokalet dhe restorantet do të mund të marrin leje speciale njëditore për të organizuar festa në ambient të hapur dhe për të zgjatur oraret e punës. Do të ketë gjithashtu një fond granti prej 500.000 dollarësh për evente komunitare lokale. Priten mijëra festa të pavarura në të gjithë qytetin.

Ky njoftim vjen në një kohë kur çmimet e biletave për ndeshjet në stadium kanë shkuar në qiell. Bileta më e lirë për ndeshjen e parë në MetLife Stadium kushton mbi 2.288 dollarë.

Kupa e Botës 2026 është hera e parë që SHBA-ja e pret turneun që nga viti 1994. Me mijëra tifozë që pritet të vijnë në Nju Jork, këto festa falas synojnë të lehtësojnë presionin mbi transportin publik dhe ta bëjnë futbollin të aksesueshëm për të gjithë banorët e qytetit, pavarësisht të ardhurave.

Në fund të konferencës për shtyp u tha se njoftime të reja priten në ditët në vijim, përfshirë edhe festa në “Open Streets” të menaxhuara nga Departamenti i Transportit.