Zhvillimet e ditëve të fundit në kampin e majtë grek po përshpejtojnë ndryshimet politike dhe po krijojnë tensione të forta brenda SYRIZA-s. Sipas informacioneve të publikuara nga Proto Thema, të paktën katër deputetë të partisë “Majta e Re” pritet të shpallin pavarësinë e tyre të martën e ardhshme, duke çuar në shpërbërjen e grupit parlamentar të kësaj force.
Bëhet fjalë për Alexis Haritsis, Efi Achtsioglou, Nasos Iliopoulos dhe Dimitris Tzanakopoulos, të cilët, sipas burimeve, kanë koordinuar lëvizjen e tyre përmes konsultimeve të zhvilluara gjatë javës. Ende mbetet e paqartë se çfarë qëndrimi do të mbajnë deputetet Sia Anagnostopoulou dhe Meropi Tzoufi.
Këto zhvillime vijnë në një moment kur krijimi i “Aleancës së Majtë Greke” (ELAS) nga ish-kryeministri Alexis Tsipras po shkakton lëkundje të forta në të gjithë spektrin e majtë. Nuk është vetëm shpallja e subjektit të ri politik që ka tërhequr vëmendjen, por edhe aktiviteti i shtuar i Tsiprasit, i cili duket se ka lënë pas përfundimisht të kaluarën e tij partiake. Më 2 qershor, instituti i tij do të organizojë një aktivitet mbi transparencën në përdorimin e fondeve publike, ndërsa vetëm pak ditë më vonë, më 6 qershor, SYRIZA do të mbledhë Komitetin Qendror në një klimë që pritet të jetë veçanërisht e tensionuar.
Kryetari i SYRIZA-s, Sokratis Famellos, ka vazhduar të mbështesë idenë e bashkëpunimeve progresiste, duke përfshirë edhe Alexis Tsiprasin në këtë perspektivë. Megjithatë, shumë figura të rëndësishme të partisë shfaqen gjithnjë e më kritike ndaj kësaj qasjeje.
Deputeti Pavlos Polakis ka qenë ndër të parët që reagoi publikisht, duke kritikuar Famellon për mungesën e një qëndrimi të qartë pas shpalljes së ELAS-it. Sipas burimeve partiake, kampi i Polakisit pritet të kërkojë ndryshim të plotë të strategjisë së partisë, duke hequr dorë nga politika e bashkëpunimeve progresiste dhe duke përqendruar SYRIZA-n në përgatitjen e menjëhershme për zgjedhjet e ardhshme parlamentare.
Në të njëjtën linjë duket se lëviz edhe ish-ministri Nikos Pappas, i cili ka kërkuar sqarime për hapat konkretë të ndërmarrë nga drejtimi i partisë. Ai ka theksuar se çdo forcë politike duhet të përgatitet për zgjedhje, pavarësisht nëse arrin ose jo marrëveshje me aleatë të mundshëm.
Ndërkohë, deputetja Rena Dourou deklaroi se me krijimin zyrtar të ELAS-it “nuk ka më vend për justifikime”, duke lënë të kuptohet se deputetët që po afrohen me projektin e ri politik të Tsiprasit duhet të përcaktojnë qartë pozicionin e tyre.
Paralelisht, në prapaskenë po zhvillohen diskutime për mundësinë që një figurë tjetër, dhe jo Sokratis Famellos, të udhëheqë një aleancë më të gjerë progresiste në të ardhmen. Mes emrave që përmenden në këto biseda janë ish-ministri i Jashtëm Nikos Kotzias dhe ekonomistja Louka Katseli.
Sipas burimeve të cituara nga Proto Thema, raportet e forcave brenda Komitetit Qendror të SYRIZA-s kanë ndryshuar ndjeshëm dhe nuk favorizojnë domosdoshmërisht ekipin aktual drejtues. Edhe pse aktualisht nuk ka një iniciativë të hapur për rrëzimin e Famellosit, shumë drejtues të partisë vlerësojnë se mbledhja e ardhshme mund të shndërrohet në një test të vështirë për autoritetin e tij politik.
Burimi: botasot.info
