Pas një muaji luftë, më shumë se gjysma e fëmijëve të Ukrainës – 4.3 milionë nga rreth 7.5 milionë – janë zhvendosur tani, thotë organizata e OKB-së për fëmijë, shkruan BBC, transmeton Bota sot.
Prej tyre, 1.8 milionë janë larguar në vendet fqinje, ndërsa 2.5 milionë janë të zhvendosur brenda Ukrainës.
“Ky është një moment historik i zymtë që mund të ketë pasoja të qëndrueshme për brezat që do të vijnë”, tha drejtoresha ekzekutive e Unicef, Catherine Russell.
Përveç traumës së dëshmisë së luftës dhe të largimit nga shtëpitë e tyre, fëmijët e Ukrainës po vuajnë për shkak të sulmeve ndaj shëndetit, arsimit dhe shërbimeve të tjera bazë, tha organizata. Rreth 1.4 milionë ukrainas nuk kanë qasje në ujë të sigurt, 4.6 milionë kanë vetëm furnizime të kufizuara.
Unicef raporton gjithashtu një rënie të vaksinimeve të rregullta të fëmijërisë kundër poliomielitit dhe fruthit në të gjithë vendin.
