Deputeti i Shkodrës Agron Çela është larguar nga Partia e Lirisë, por ende nuk ka konfirmuar se kujt force politike do t’i bashkohet.
Kjo lëvizje vjen vetëm pak muaj para zgjedhjeve lokale të 14 majit. Ndërsa nuk e përjashton mundësinë e bashkimit me Partinë Socialiste, burimet thonë se ai ka pasur një takim me kryeministrin Rama, për të zyrtarizuar bashkimin.
“Nga Partia e Lirisë jam shkëputur, por vendimet e reja do të merren më vonë”, ka thënë Çela për “5pyetjet”, duke shtuar “unë jam shumë korrekt, kam mbyllur një lëvizje me Partinë e Lirisë, po shikoj rrugë të tjera. Kam shumë oferta nga parti të tjera”.
Në zgjedhjet vendore të 14 majit deputeti Çela do të mbështesë në Shkodër kandidatin e Partisë Socialiste.
Me ardhjen e Agron Çelës, PS-ja në Kuvend bëhet me 74 deputetë dhe koalicioni i majtë së bashku me PSD-në shkon në 78 deputetë.
