Shefi i diplomacisë evropiane Josep Borrell deklaroi sot në Uashington, pas takimit të Këshillit të Energjisë SHBA-BE, se Rusia nuk heziton të përdorë furnizimet e saj të rëndësishme energjetike në Evropë si një instrument për përfitime gjeopolitike.
Gjatë një konference të përbashkët për shtyp me sekretarin e Shtetit Antony Blinken, Borrell bëri thirrje për diversifikimin e burimeve të energjisë për të reduktuar varësinë nga Rusia, furnizuesi kryesor i gazit natyror në Evropë, dhe për të siguruar stabilitetin e tregut të gazit, i cili sot është 10 herë më i shtrenjtë në BE se një vit më parë.
“Sot, ne kemi dërguar një mesazh të fortë të vendosmërisë së ndërsjellë për të forcuar sigurinë energjetike në BE dhe mjedisin tonë të afërt. E kam fjalën për Ukrainën, por edhe për Ballkanin Perëndimor”, tha Borrell.
Ai theksoi rëndësinë e punës së përbashkët ndërmjet BE-së dhe Shteteve të Bashkuara në kalimin nga lëndët djegëse fosile në burimet e rinovuara të energjisë, përkatësisht në përmbushjen e qëllimit përfundimtar të neutralitetit klimatik.
Borrell i kushtoi një rëndësi të madhe përgjigjes unike që BE-ja dhe SHBA-ja kanë ndaj kërcënimeve ruse në Evropën Lindore.
Ai theksoi se Moskës i është bërë vazhdimisht thirrje për de-përshkallëzimin e situatës dhe se aktivitetet diplomatike po vazhdojnë në nivele të ndryshme.
“Ne besojmë se një zgjidhje diplomatike është ende e mundur dhe kjo është një prioritet i qartë. Në të njëjtën kohë, ne jemi të vendosur se çdo agresion i mëtejshëm kundër Ukrainës do të ketë pasoja të mëdha. Shpresojmë për më të mirën, por po përgatitemi për më të keqen”, tha Borrell.
Kreu i diplomacisë së BE-së arriti në përfundimin se nëse Rusia vazhdon me agresion, aktivitetet e BE-së dhe SHBA-së do të koordinohen, duke përfshirë sanksionet.
