Bllokada e Hormuzit po hap rrugë tokësore alternative për tregtinë

Mbyllja e Ngushticës së Hormuzit po riformëson rrugët tregtare, me trafikun e anijeve me kontejnerë që tani po përdor rrugë tokësore për të arritur destinacionet, raporton agjencia e lajmeve AFP.

Bllokada e ngushticës i ka detyruar pronarët e anijeve të gjejnë korridore alternative tokësore për të dërguar produkte ushqimore dhe mallra të prodhuara me kamionë, pasi nuk mund të arrijnë më në vendet bregdetare të Gjirit përmes detit, sipas burimeve nga logjistika dhe sektori detar, raporton A2CNN.

Sipas AFP-së, porti saudit i Xhedahut në Detin e Kuq po bëhet një “qendër” e re rajonale, ku anije nga gjigantët detarë MSC, CMA CGM, Maersk dhe Cosco mbërrijnë përmes Kanalit të Suezit.

Më pas, ngarkesat transportohen me kamion përgjatë një autostrade shkretëtire për t’u dorëzuar në vende si Sharjah, Bahrein dhe Kuvajt, të cilat nuk janë furnizuar me rrugë detare për dy muajt e fundit.

“Porti i Xhedahut nuk është aspak i dimensionuar për të përballuar këto volume importi dhe po shfaqet një situatë mbingarkese portuale,” tha Arthur Barillas de The, bashkëthemelues i kompanisë së transportit Ovrsea.

Pronarët e anijeve kanë deklaruar gjithashtu se do të përdorin tre porte jashtë Ngushticës së Hormuzit – Sohar në Oman, si dhe portet Khor Fakkan dhe Fujairah në Emiratet e Bashkuara Arabe. Porti i Akabës në Jordani shërben si bazë për dërgimin e mallrave në Bagdad dhe Basra në Irak, ndërsa një korridor turk po lejon gjithashtu hyrjen e mallrave në veri të Irakut, sipas raportit.