Një 46-vjeçar nga fshati Monospitovë, në rrethinën e Strumicës, është privuar nga liria pasi policia ka gjetur marihuanë gjatë kontrollit ndaj tij. Sipas Ministrisë së Punëve të Brendshme, ai më pas ka dorëzuar vullnetarisht edhe dy shishe plastike të mbushura me marihuanë, të cilat i mbante në shtëpinë e tij.
“Më 9 tetor 2026, në orën 13:50, në Strumicë, nëpunës policorë të SPB-së Strumicë e kanë privuar nga liria M.N. (46) nga fshati Monospitovë, në rrethinën e Strumicës. Gjatë kontrollit të kryer ndaj tij, është gjetur marihuanë”, njoftojnë nga MPB-ja.
Sipas njoftimit, pas bisedës zyrtare me policinë, 46-vjeçari ka dorëzuar vullnetarisht edhe dy shishe plastike të mbushura me marihuanë, të cilat i kishte në shtëpinë e tij.
Për rastin është njoftuar prokurori publik, ndërsa nga MPB-ja bëjnë të ditur se, pas dokumentimit të plotë të ngjarjes, ndaj personit do të parashtrohet kallëzimi përkatës.
Burimi: alfax.mk
