Dy vëllezër nga Kruja janë arrestuar nga policia, pasi njëri prej tyre nën kërcënimin e armës ka vjedhur një shumë parash, katër vjet më parë në një karburant.
Ndërsa në muajin prill të vitit 2024, ata të dy kanë goditur me grushte një person dhe më pas kanë qëlluar me armë zjarri, në ajër.
“Finalizohet operacioni policor i koduar “Brothers”, për kapjen e 2 shtetasve (vëllezërve) në kërkim për vepra të ndryshme penale. Njëri prej tyre, i dënuar me 3 vjet e 4 muaj burgim, si bashkëpunëtor në vjedhjen me armë, të një shume parash, në një karburant, në fshatin Arramerras, në vitin 2021”.
“2 vëllezërit, në muajin prill 2024, dyshohet se kanë goditur me grushte një shtetas dhe më pas kanë qëlluar me armë zjarri, në ajër. Komisariati i Policisë Krujë, në bashkëpunim me shërbimet e Forcës së Posaçme “Shqiponja”, bazuar në inteligjencën informative, ka organizuar dhe finalizuar operacionin e koduar “Brothers”, si rezultat i të cilit janë kapur dhe ndaluar shtetasit në kërkim: 21 vjeç dhe 27 vjeç (vëllezër), të dy banues në Krujë”.
“Shtetasin Gjykata e Apelit e ka dënuar me 3 vjet e 4 muaj burgim, për veprat penale “Vjedhja me armë”, e kryer në bashkëpunim dhe “Mbajtja pa leje dhe prodhimi i armëve, armëve shpërthyese dhe municionit”, si bashkëpunëtor në vjedhjen me armë, të një shume parash, në një karburant, në fshatin Arramerras, në vitin 2021”, thuhet në njoftimin e policisë./
Burimi: botasot.info
