Arsimi shqiptar po përballet me një krizë të paprecedentë që po zbraz me shpejtësi auditoret e universiteteve. Të dhënat më të fundit zyrtare tregojnë një rënie shqetësuese prej 5.5% të numrit të studentëve, një shifër kjo që paralajmëron pasoja të rënda për të ardhmen e rinisë dhe të mbarë shtetit.

I ftuar në studion e lajmeve në “Ora News”, ishte pedagogu Lush Susaj, i cili u shpreh se nga brenda mureve të institucioneve akademike, situata paraqitet edhe më e zymtë.

Susaj u shpreh se veçanërisht në institucione me rëndësi jetike si Universiteti Bujqësor, konfirmojnë se kolapsi po vjen nga prishja e balancave. Ekziston një hendek i madh mes asaj që kërkon rinia, asaj që ofron universiteti dhe kërkesave reale të tregut të punës. Ndonëse prodhohen specialistë, mungon një zhvillim i qëndrueshëm dhe harmonik që të lidhë formimin akademik me nevojat e terrenit.

“Jam në kontakt edhe me prodhimin, sepse universiteti bujqësor ka një specifikë që prodhon specialistë për teknologjitë bujqësore dhe jam në kontakt edhe me terrenin, pra e di se çfarë bëhet në universitet, çfarë kërkon rinia e çfarë ka terreni e çfarë kërkon terreni. Dhe sikurse gjithmonë këto probleme lindin aty ku prishen balancat e ku nuk ka zhvillim të qëndrueshëm e harmonik.

Dhe duke, këtë problem për fat të mirë e shoh, madje dhe shprehem, e shkruaj siç kam shkruajtur edhe sot e ditë të tjera në gazetat e përditshme. E shoh gjithmonë edhe nga këndvështrimi i reagimit por edhe i mungesës totale të reagimit nëpër, në shoqërinë tonë edhe sidomos mungesa e reagimit të sindikatave dhe i studentëve dhe i specialistëve”, u shpreh Susaj.

Burimi: botasot.info