Akuzohet për sulmin kimik në Ghoutën Lindore, Siria arreston ish-gjeneralin e Assadit

Autoritetet e reja në Siri kanë arrestuar një ish-gjeneral të regjimit të Bashar al-Assad, i akuzuar për përfshirje në një nga sulmet kimike më vdekjeprurëse të luftës civile siriane. Sipas Ministrisë së Jashtme siriane, është arrestuar Hardal Ahmad Dayoub, ish-gjeneral brigade dhe ish-shef i inteligjencës së Forcave Ajrore në rajonin Daraa. Autoritetet e akuzojnë atë për koordinimin e bombardimit me armë kimike në Ghouta Lindore në vitin 2013, sulm që konsiderohet ndër më të rëndët gjatë konfliktit sirian.

Më 21 gusht 2013, zonat e kontrolluara nga rebelët në Ghoutën Lindore dhe Muadamiyat al-Sham u goditën me armë kimike, duke shkaktuar tronditje në mbarë botën. Pamjet e viktimave, përfshirë shumë fëmijë, bënë jehonë ndërkombëtare, ndërsa aktivistët raportuan për familje të tëra të shfarosura. Shtetet e Bashkuara deklaruan se të paktën 1,429 persona u vranë, mes tyre 426 fëmijë, dhe akuzuan regjimin sirian për kryerjen e sulmit, duke thënë se ishte kaluar “vija e kuqe” e vendosur nga presidenti i atëhershëm Barack Obama. Megjithatë, Uashingtoni nuk ndërhyri ushtarakisht, pasi pranoi një marrëveshje të propozuar nga Rusia për çmontimin e arsenalit kimik sirian.

Sipas ministrisë siriane, Dayoub akuzohet gjithashtu për ekzekutime civile dhe bashkëpunim me inteligjencën iraniane dhe Hezbollah, grupi i mbështetur nga Irani që luftoi në krah të regjimit të Assadit kundër rebelëve. Arrestimi i tij është pjesë e një vale arrestimesh ndaj ish-zyrtarëve të regjimit, pas rrëzimit të Assadit në vitin 2024. Në prill ishte arrestuar edhe ish-gjenerali Adnan Abud Hilweh, i akuzuar gjithashtu për përfshirje në sulmin kimik të vitit 2013. Konflikti sirian, që nisi në vitin 2011 pas shtypjes së protestave pro-demokraci, ka shkaktuar mbi 500 mijë viktima dhe miliona të zhvendosur.

Ndërkohë, proceset gjyqësore ndaj figurave të regjimit të mëparshëm kanë nisur tashmë në Siri. Një seancë e parë ndaj ish-presidentit Assad dhe bashkëpunëtorëve të tij u zhvillua më 26 prill, ndërsa vetë Assad ndodhet në Moskë që prej largimit nga Siria në dhjetor 2024.