Asociacioni i Gazetarëve të Kosovës [AGK], ka hedhur poshtë letrën e Federatës së Futbollit të Kosovës për mediat.
FFK-ja kishte kërkuar nga AGK, SHGSK dhe KPM që mediat të respektojnë etikën e gazetarisë, pasi të njëjtit pretendonin se po bëhet “fushatë” medatike kundër FFK-së dhe Kombëtares së Kosovës.
Ndër tjerash, ata kishin kërkuar që të ndalohen fyerjet, shantazhet e kërcënimet, kinse po bëhen në drejtimin e tyre.
Pas pranimit të kësaj letre, AGK-ja ka reaguar në drejtim të Federatës.
Ata kanë hedhur poshtë letrën e tyre duke i quajtur të gjitha pretendimet si të pabaza dhe presion të hapur ndaj gazetarëve dhe mediave në Kosovë.
“Në letër, FFK-ja, akuzon, pa asnjë bazë, disa emisione sportive se po bëjnë “fushatë mediale kundër FFK-së. AGK-ja, e konsideron këtë letër të hapur të FFK-së, si të papranueshme dhe presion të hapur ndaj gazetarëve dhe medieve në Kosovë”, shkruhet në njoftimin e tyre.
Kujtojmë që ky reagim nga FFK, vjen pak ditë pasi në media u raportua, se i pari i FFK-së, Agim Ademi kishte kërcënuar lojtarët e përjashtuar së fundmi nga grumbullimi me Kombëtaren e Kosovës.
Burimi: botasot.info
