Qeveria sllovene nuk po shqyrton lehtësimin e masave antiCOVID për shkak të përhapjes jashtëzakonisht të madhe të variantit omicron dhe frikësohet se kjo tendencë do të vazhdojë.
Siç deklaroi sot ministri i Shëndetësisë Janez Poklukar, lehtësimi i masave për momentin do të ishte i parakohshëm dhe tepër i rrezikshëm, duke qenë se kulmi i kësaj vale pritet në gjysmën e dytë të shkurtit.
“Epidemia është ende në rritje dhe 17.000 infeksione të reja regjistrohen çdo ditë, dhe javën e kaluar shtrimi në spital ishte një e treta më e lartë se në javën e kaluar”, tha Poklukar, transmeton Hina.
Sipas tij, për shkak të kësaj dhe numrit të shtuar të vdekjeve në javën e kaluar, është joracionale të mendohet për masa relaksuese tani.
“Kjo do të jetë e mundur vetëm kur kjo valë të arrijë kulmin e saj dhe kur të jetë e nevojshme të bihet dakord se si të vazhdohet,” tha ministri slloven.
“Megjithëse shkalla e shtrimit në spital për të infektuarit me omicron është katër herë më e ulët se për variantin delta, me rritjen e infeksioneve ditore mund të nënkuptojë 300 shtrime në ditë”, shtoi ai.
Në 24 orët e fundit, në Slloveni është regjistruar një rekord i ri i rasteve ditore me koronavirus – 17.491.
Aktualisht janë 670 pacientë me COVID në spitale, 127 prej të cilëve në reparte të kujdesit intensiv.
