„Иницирањето криза не е во интерес на граѓаните и ничија лична кариера не е поважна од интересите на граѓаните. Мое убедување е, а и искуство дека блокадите и опструкциите во Собранието не донеле добро на никој“ кажа членот на Извршниот одбор на СДСМ, Андреј Петров, во вечерашното гостување на ТВ Телма.
Тој додаде дека дури и кога тие како опозиција блокирале, времето покажало дека тоа немало никаков ефект на билдањето на рејтинг на партиите или постигнување на некакви цели.
„Интересот на државата е да се екипира Уставниот суд. Во моментот треба низ дијалог да се најде начин како да се надмине проблемот и да се изберат преостанатите судии.“ потенцираше Петров.
Тој додаде дека за парламентарните прашања треба да се разговара во Парламентот, но креирањето за тој амбиент доаѓа од политичките партии.
Според Петров, не треба да се брза со менувањето на изборниот модел во државата.
„Изборниот законик треба да се донесе во квалитетна процедура, која може да трае и повеќе од една година. Ние сакаме да го смениме изборниот модел набрзина. Ако сакаме квалитетно решение и да имаме консензус не може тоа да го направиме утре“, рече Петров.
Промената на изборниот модел е сериозна реформа, за која експерти кои се занимаваат со таа проблематика треба да го кажат своето мислење, смета членот на Извршниот одбор на СДСМ.
„Треба да се отворат повеќе јавни расправи, да се повикаат повеќе експерти. Треба да се согледаат сите недостатоци од минатото, што пречело, што било добро и каде сакаме да одиме“ кажа Петров.
Тој додаде дека според примерите од другите земји, изборните закони се приготвуваат подолг период и се усвојуваат на најмалку шест месеци пред изборите, со цел партиите да може да се прилагодат на измените.
