Ahmet Gencturk, Sumeyye Dilara Dincer
Lufta në Ukrainë tregon se si duket lufta e së ardhmes, tha për Anadolu Agency (AA), Ndihmës Sekretari i Përgjithshëm i NATO-s për Sfidat e Reja të Sigurisë, David van Weel.
“Edhe pse armët konvencionale, përfshirë tanket dhe artilerinë dhe taktikat si hapja e istikameve përdoren gjerësisht në fushën e betejës, teknologjitë moderne që Aleanca i ka ofruar Ukrainës që nga viti 2014 kanë luajtur rol kyç në forcimin e rezistencës së Kievit kundër Moskës”, tha David van Weel.
Ai vuri në dukje se kur filloi lufta në Ukrainë më 24 shkurt, sulmet ruse nuk ishin të kufizuara në objektiva të ndjeshme dhe se Moska goditi gjithashtu hapësirën kibernetike të vendit.
Sipas tij, ndihma e NATO-s dhe e kompanive private të teknologjisë, i mundësoi Kievit të zmbraps përpjekjet ruse.
Van Weel theksoi se inteligjenca artificiale (IA) ka ndihmuar në rritjen e përgjigjes së ukrainasve ndaj sulmeve duke i informuar ata për vendndodhjen dhe synimet e trupave ruse.
Ai tha se NATO ka ekosistemin më të zhvilluar të inovacionit, i cili përfshin disa nga universitetet dhe kompanitë më të mira të teknologjisë në botë.
“Ajo që është e rëndësishme është transferimi i potencialit dhe teknologjive të tyre në përdorim ushtarak”, tha Van Weel, duke shtuar se ky është një nga prioritetet e aleancës.
I pyetur për dronët e prodhimit turk që përdor Ukraina në fushëbetejë, zyrtari i lartë i NATO-s tha se ata “luajnë rol të madh në Ukrainë”.
Ai theksoi se industria turke e dronëve është “shembull shumë i mirë i ekosistemit shumë të gjallë të inovacionit që ekziston këtu”.
“Ky është një shembull i mirë se çfarë mund të bëjë inovacioni në luftën moderne”, tha Van Weel.
