Presidentja e Kosovës, Justina Shiroka Pula, ka zhvilluar sot një takim me ministrin e Punëve të Jashtme të Zvicrës dhe njëherësh kryesuesin e radhës të Organizatës për Siguri dhe Bashkëpunim në Evropë (OSBE), Ignazio Cassis.
Pas takimit, Presidenca e Kosovës ka bërë të ditura detajet e diskutimeve, duke zbardhur temat që janë trajtuar mes presidentes dhe kryediplomatit zviceran, transmeton “Bota sot”.
Sipas njoftimit, gjatë takimit Shiroka Pula ka vlerësuar marrëdhëniet e shkëlqyera ndërmjet Kosovës dhe Zvicrës, ndërsa e ka falënderuar Cassisin për mbështetjen e vazhdueshme që shteti zviceran i ka dhënë Kosovës.
Një pjesë e rëndësishme e diskutimeve i është kushtuar bashkëpunimit ekonomik, me ç’rast presidentja ka theksuar nevojën për thellimin e mëtejmë të marrëdhënieve ekonomike, rritjen e shkëmbimeve tregtare dhe shtimin e investimeve zvicerane në Kosovë.
Shiroka Pula ka vlerësuar bilancin e mirë tregtar ndërmjet dy vendeve, por ka theksuar se ekziston potencial për rritjen e mëtejshme të tij, veçanërisht përmes mundësive që ofron Asociacioni Evropian i Tregtisë së Lirë (EFTA).
Në takim është diskutuar edhe pozita ndërkombëtare e Kosovës dhe nevoja për vazhdimin e mbështetjes së Zvicrës në procesin e anëtarësimit të vendit në organizatat ndërkombëtare.
Në këtë kontekst, presidentja ka vënë në pah edhe rëndësinë e mërgatës shqiptare në Zvicër, duke e cilësuar atë si një urë të fuqishme lidhëse ndërmjet dy shteteve. Ajo ka theksuar kontributin aktiv të shqiptarëve në shoqërinë zvicerane dhe rolin e tyre në forcimin e raporteve ndërmjet Kosovës dhe Zvicrës.
Një tjetër çështje e ngritur nga presidentja ka qenë kontributi i kontingjentit zviceran të KFOR-it, për të cilin ajo ka shprehur mirënjohje për angazhimin në Kosovë që nga viti 1999.
Ndërkaq, ministri i Jashtëm zviceran, Ignazio Cassis, ka rikonfirmuar se Zvicra do të vazhdojë ta mbështesë Kosovën edhe në të ardhmen. Sipas njoftimit të Presidencës, ai ka shprehur gjithashtu mbështetjen e tij për presidenten Shiroka Pula.
Cassis po qëndron në Kosovë në kuadër të një vizite zyrtare në Ballkanin Perëndimor, ku përveç Kosovës ka vizituar edhe Serbinë, ndërsa agjenda e tij përfshin edhe Maqedoninë e Veriut. Gjatë qëndrimit në Prishtinë, ai pritet të takohet edhe me ministrin e Punëve të Jashtme, Glauk Konjufca.
Burimi: botasot.info
