Përpara një samiti të NATO-s në kryeqytetin lituanez Vilnius, presidenti ukrainas, Volodymyr Zelenskyy, ka deklaruar se ftesa për vendin e tij për t’u anëtarësuar në NATO do të demonstronte “guximin dhe forcën” e aleancës, transmeton Anadolu.
“Gjithçka që nevojitet është një ftesë. Ne e kuptojmë se mund të ketë vështirësi me këtë apo atë formulim për të marrë mbështetjen e bashkuar të të gjitha partnerëve nga Aleanca, megjithatë besoj se ky është një moment i tillë, një mundësi e madhe të tregoni guximin dhe forcën e të gjithë Aleancës”, tha Zelenskyy në një konferencë të përbashkët për media mbrëmë vonë me homologun e tij çek, Petr Pavel, gjatë një vizite zyrtare në Pragë.
Sipas një njoftimi të lëshuar nga presidenca ukrainase, Zelenskyy tha se Kievi është duke pritur për një sinjal konkret në lidhje me ftesën për t’u anëtarësuar në NATO dhe se vendi i tij kërkon këtë motivim, si dhe “ndershmërinë në marrëdhëniet tona”.
Sipas presidentit ukrainas, NATO-ja ende nuk ka gjetur një qasje të përbashkët në lidhje me anëtarësimin e Suedisë në aleancë, si dhe shtoi se çështje të shumta në lidhje me mbështetjen e mbrojtjes për Kievin do të diskutohen në samitin e NATO-s në Vilnius.
Zelenskyy gjithashtu shprehu mirënjohje për Republikën Çeke për pritjen e ukrainasve që ikin nga lufta e vazhdueshme me Rusinë, si dhe për mbështetjen ushtarake dhe ekonomike të Pragës për Kievin.
Njoftimi i presidencës ukrainase po ashtu theksoi se dy presidentët diskutuan çështje të përbashkëta të sigurisë dhe forcimin e bashkëpunimit të mbrojtjes, me presidentin Zelenskyy që theksoi nevojën për më shumë sanksione kundër Rusisë.
Presidenti ukrainas gjithashtu iu përgjigj një pyetje lidhur me vizitën e tij në Türkiye, duke treguar se ai beson se do të arrijë marrëveshje me homologun e tij turk, Recep Tayyip Erdoğan.
“Ne kemi disa çështje. Nisma e drithërave është një çështje shumë e rëndësishme e mbështetjes për Ukrainën në NATO. Shkëmbimi i të burgosurve… ka shumë gjëra që do të diskutojmë dhe besoj se do të kemi marrëveshje me presidentin e Türkiyes”, tha ai.
– Pavel premton mbështetje për Ukrainën
Pavel, nga ana e tij, shprehu mbështetjen e qeverisë së tij për Kievin, duke theksuar se aspiratat e Ukrainës për t’u bashkuar me Bashkimin Evropian (BE) dhe NATO-n duhet të mbështeten.
“Ne do të bëjmë gjithçka për këtë. Do të përpiqemi të sigurojmë që procesi i negociatave të nisë deri në fund të këtij viti dhe të thuhet qartë se Evropa do të qëndrojë pranë Ukrainës në të ardhmen”, tha Pavel.
Ai e siguroi homologun e tij ukrainas se Republika Çeke do të vazhdojë ta mbështesë atë në këtë drejtim.
Pavel po ashtu tha se shumë kompani çeke po bashkëpunojnë me kompanitë ukrainase dhe janë “të etur për të marrë pjesë në rindërtimin” e vendit si gjatë edhe pas luftës së Rusisë.
“Ne e shohim këtë si një mundësi të mirë për kompanitë çeke. Ky është një bashkëpunim reciprokisht i dobishëm dhe ne duhet t’i kushtojmë vëmendje të mjaftueshme”, tha ai.
