Këshilltari i koalicionit VLEN në Këshillin e Qytetit të Shkupit, Zekerija Berisha, ka reaguar lidhur me cilësinë e ujit të pijshëm në kryeqytet, duke thënë se analizat e kryera nga institucionet kompetente kanë konfirmuar se uji është i sigurt për konsum.
Berisha ka theksuar se janë marrë 42 mostra nga rrjeti i ujësjellësit dhe se analizat mikrobiologjike, fiziko-kimike, si dhe analiza e jashtëzakonshme PCR, nuk kanë evidentuar praninë e baktereve të dëmshme.
“Uji i Shkupit është kontrolluar dhe është i sigurt për pije. Institucionet kompetente kanë marrë 42 mostra nga rrjeti i ujësjellësit, ndërsa analizat mikrobiologjike dhe fiziko-kimike janë në përputhje me standardet. Edhe analiza e jashtëzakonshme PCR nuk ka treguar prani të E. coli, koliformeve apo Pseudomonas aeruginosa.
Këto janë fakte. Gjithçka tjetër është përpjekje për të prodhuar frikë.
Dhe këtu duhet të jemi shumë të qartë: nuk bëhet opozitë me shëndetin e njerëzve!
Është e papranueshme që kushdo, nga cilado parti apo radhë politike qoftë, të tentojë të fitojë pikë politike duke mbjellë panik për ujin që pinë fëmijët tanë, familjet tona dhe qindra mijëra qytetarë të Shkupit.
Opozitarizmi është legjitim. Kritika është e nevojshme, por përhapja e frikës pa prova nuk është opozitë, është papërgjegjësi politike dhe shoqërore.
Kur ka problem real, ne si këshilltarë të VLEN-it në Këshillin e Qytetit të Shkupit do të jemi të parët që do të kërkojmë përgjegjësi, transparencë dhe masa konkrete. Por kur dikush përpiqet të fabrikojë krizë aty ku analizat thonë të kundërtën, do ta themi po aq hapur: mjaft me manipulimin e qytetarëve!
Shëndeti publik nuk është armë politike.
Uji i pijshëm nuk është temë për propagandë.
Frika e prindërve nuk është kapital elektoral.
Politikë bëni sa të doni, por duart larg shëndetit të qytetarëve!
Me shëndetin nuk bëhet politikë. Me panikun nuk fitohet besimi, dhe me frikën e qytetarëve nuk mblidhen vota.
Shëndeti dhe siguria e qytetarëve janë mbi çdo parti, mbi pushtetin dhe mbi opozitën”, ka shkruar Berisha.
Burimi: alfax.mk
