Qeveria e Republikës së Maqedonisë së Veriut ka miratuar vendimin për formimin e Komitetit Nacional për Mbrojtjen dhe Sigurinë e Gazetarëve, me synimin për të garantuar kushte më të sigurta për ushtrimin e gazetarisë së lirë dhe të pavarur.
Lajmin e ka bërë të ditur zëdhënësja e Qeverisë, Venera Azizi, përmes një postimi në facebook, ku ka theksuar se mbrojtja e gazetarëve dhe garantimi i lirisë së medias janë ndër prioritetet e ekzekutivit.
Sipas Azizit, komiteti do të angazhohet për forcimin e mekanizmave të mbrojtjes nga kërcënimet, sulmet dhe presionet ndaj gazetarëve, si dhe për hetimin efektiv të rasteve dhe luftimin e mosndëshkimit.
Në fokus do të jetë edhe mbrojtja nga dhuna digjitale dhe paditë abuzive SLAPP, të cilat përdoren për të ushtruar presion mbi gazetarët dhe për të penguar punën e tyre hulumtuese.
„Gazetarët duhet të jenë të lirë të pyesin, të hulumtojnë dhe të kritikojnë, pa frikë dhe pa presion“, ka theksuar Azizi në mesazhin e saj.
Zëdhënësja e qeverisë, Venera Azizi gjithashtu ka nënvizuar se mbrojtja e gazetarëve nënkupton njëkohësisht edhe mbrojtjen e së vërtetës, transparencës dhe demokracisë.
